नेपाली सेनाको कडा सन्देश, ‘सैनिक शासन’ लागू गर्ने संकेत – देश बचाउन जुनसुकै बेला पनि स्वतः परिचालन हुने

काठमाडौं, २३ फागुन । नेपाली सेनाका प्रधान सेनापति राजेन्द्र क्षत्रीले देश टुक्राउने खालका सुरक्षा चुनौती भए नेपाली सेना स्वत परिचालन हुने बताए । उनले सुरक्षा कारवाही राजनीतिक प्रक्रियालाई सहज बनाउन उपयुक्त वातावरण श्रृजना गरी दिने माध्यम मात्र भएकोले सुरक्षा चुनौतीको दिगो समाधान खोज्नु पर्ने धारणा राखे । उनले राष्ट्रिय एकता र भौगोलिक अखण्डतालाई खतरा पु¥याउने प्रवृत्तिका सुरक्षा चुनौतीहरु श्रृजना भएमा नेपाल सरकारको निर्देशन अनुसार विधिसम्मत् तरिकाले नेपाली सेना स्वतः परिचालन हुने जानकारी गराए ।राष्ट्रिय हित प्रतिकुलका अवान्छित गतिविधिहरुको नेपाली सेनाले नजिकबाट सुक्ष्म तरिकाले अध्ययन र विश्लेषण गरी सोही अनुसारको रणनीति तयार गरी रहेको जानकारी गराए । नेपाली सेना, सारा नेपाली जनताको साझा राष्ट्रिय सेना भएकोले प्राप्त जिम्मेवारीहरु प्रभावकारी ढंगबाट वहन गर्न चुस्त अपरेशनल तयारीपन र पेशागत दक्षता भएको फौजको रुपमा नेपाली सेनालाई आधुनिकीकरण गर्न अति आवश्यक रहेको औंल्याए ।

महाशिवरात्री तथा सेना दिवस २०७२का अवसरमा ‘कफि टेवल’ नामक पुस्तकको पाँचौ संस्करण विमोचन गरेका छन् । क्षत्रीले नेपालको संविधानले सुम्पेको जिम्मेवारीहरु असरदार रुपमा बहन गर्न नेपाली सेना हरहमेशा कटिबद्ध, सक्षम र तयार रहेकोले नेपाल सरकारले राष्ट्र र जनताको सर्वोपरी हितको लागि संवैधानिक प्रक्रिया अनुरुप प्रदान गर्ने सबै जिम्मेवारीहरुको पूर्णरुपमा पालना गर्नु नेपाली सेनाको प्रमुख दायित्व रहेको बताए ।

उनले समय समयमा हुने इन्धन अभावको कारण नियमित कार्यहरुमा पु¥याउने असरलाई दीर्घकालीन रुपमा समाधान गर्न बायो ग्यांस प्लाण्ट जडान गर्ने, नागरिक(सैनिक सम्बन्धको विकासमा जोड दिए । उनले आगामी दिनहरुमा राष्ट्रिय सेवा दलले गरिरहेको युवा नेतृत्व विकास कार्यक्रमको दायरालाई थप फराकिलो बनाउंदै देशका सबै जिल्लाहरुमा यसको पहुंच विस्तार गर्ने र वेत्रावती,रसुवागढी सडकको मैलुङ्ग स्याफ्रुवेसी खण्ड विस्तार तथा स्तरोन्नती समय अगावै सम्पन्न गर्न अघि बढेको जानकारी गराए ।

भूकम्पबाट क्षतिग्रस्त सैनिक संरचनाहरुको पुनर्निर्माण तिव्ररुपले गर्नुपर्ने बताउदै सेनाका बहालवाला तथा अवकाश प्राप्त ५१ हजार ५ सय २३ जना सैनिकहरुलाई पुग्न गएको क्षतिप्रति संवेदनशील भई सैनिक कल्याणकारी कोषबाट २ अर्ब ३९ करोड ९८ लाख ३२ हजार रुपैयाँ राहत वितरण गरिसकिएको साथै करिब २८ लाख ५० हजार उपलब्ध गराईसकिएको जानकारी गराए ।